Всемирный Конгресс принял Обращение к крымскотатарскому народу

II Всемирный Конгресс крымских татар в Анкаре принял Обращение к крымскотатарскому народу. Обращение зачитал известный турецкий историк крымскотатарского происхождения, профессор Хакан Кырымлы. За Обращение проголосовали все делегаты.

Информагентство QHA представляет полный текст обращения к народу на крымскотатарском языке (латиницей).

DÜNYA QIRIMTATAR KONGRESSİNİÑ 
QIRIMTATAR HALQINA
MURACAATI 

Vatanımız Qırımda ve diasporada yaşağan Qırımtatarları tarafından teşkil etilgen 180 cemaatçılıq teşkilatı 1-2 Avgust 2015 tarihında Anqarada toplanaraq, milliy idare organları olğan Qırımtatar Milliy Kurultayı ve Qırımtatar Milliy Meclisine halqara saada qol tutmaq ve faaliyetlerini koordinatsiya etmek maqsadınen halqara içtimaiy teşkilatı sıfatında “Dünya Qırımtatar Kongressi”ni meydanğa ketire.

Dünya Qırımtatar Kongressi ve onıñ bütün qurucı azaları;

1- Tarihiy ve yekâne Vatanımız Qırımınıñ ve milletimizniñ öz qaderini belgilev aqqınıñ tek Qırımtatar halqına ait olğanı,

2- Dünyadaki bütün Qırımtatarlarnıñ Vatanları Qırımda öz milliy devletçiliginde, insan aq-uquqlarına sayğı ve demokratiya printsipleri çerçivesinde, barışıq, tınçlıq ve amanlıq içinde yaşav aqqı olğanı,

3- Tarih boyunca Qırımtatarlarnı yoq etüv maqsadınen areket etken küçlerniñ Vatanımız Qırımdaki işğalini deral toqtatuv,

4- Qırımtatarlarnıñ yoq oluv tehlükesi astında bulunğan tillerinen milliy, maneviy ve medeniy variyetleriniñ saqlanuvı ve kelecek nesillerge keçirilüvi içün qararlılıq içinde areket etilüvi,

5- Kerek olğan şartlarnıñ teminlenüvinen, dünyadaki bütün Qırımtatarlarnıñ yekâne ve tarihiy Vatanları olğan Qırımğa qaytıp, anda yerleşüvleri içün bütün tedbir ve imkânlarnıñ seferber etilüvi,

6- Qırımtatar halqını yoq etüv maqsadınen areket etkenlerniñ halqara mahkemelerde cezalandırıluvı ve Qırımtatar halqınıñ zararlarınıñ tazmin etilerek adaletniñ teminlenüvi,

7- İşğal astındaki Vatanımız Qırımda yaşağan vatandaşlarımıznıñ canlarına, mallarına ve başqa er türlü aq-uquqlarına keder etecek iç bir şeyge yol berilmeyüvi,

8- İşğal astındaki Vatanımız Qırımda yaşağan vatandaşlarımıznıñ ve Qırımtatar halqınıñ bu qıyın künlerinde yanında olğan Qırımdaki bütün insanlarnıñ er türlü insaniy, içtimaiy, medeniy ve maneviy ihtiyaclarınıñ teminlenüvi ve Qırımdaki adaletsizliklerni toqtatmaq içün er türlü imkânnıñ qullanıluvı,  ususlarında milliy gimnimiz Ant Etkenmenniñ ruhı boyunca til, fikir ve iş birliginen areket etmege Ant Ete.

Bu Ant boyunca, Dünya Qırımtatar Kongressi;

1- Dünyanıñ qaysı yerinde yaşasa da bütün Qırımtatarlarnı, Qırımdaki işğalniñ deral toqtatıluvı ve yekâne vatanımız olğan Qırımda öz qaderini belgilev aqqı içün küreşmege,

2- Bütün Qırımtatar halqını, meşru milliy temsil organlarımıznı yani üriyet şeraitinde saylanğan Qırımtatar Milliy Qurultayına, Qırımtatar Milliy Meclisine ve Dünya Qırımtatar Kongressine qol tutmağa, bu organlarnıñ printsip ve qararları boyunca areket ve faaliyet alıp barmağa,

3- Bu şiar ve printsiplerni qabul etken bütün Qırımtatar cemaatçılıq teşkilatlarını, siyasiy ve içtimaiy müesseselerni, media organlarını ve Qırımtatar milliy küreşine qol tutmaq istegen diger teşkilatlarnı Dünya Qırımtatar Kongressi çatısı astında birleşmege,

4- Milletimizni ortadan kötermege ıntılğanlarnıñ yoq oluvını eñ başta istegenleri öz tilimiz Qırımtatarcanı ve milliy menligimizni canlı tutmaq içün er şeyni yasamağa, til ve medeniyetimiz içün zarur olğan bütün zamaneviy müesseselerni teşkil etmege, tedbirlerni almağa, öz aramızda ve qorantamız içinde mıtlaq öz tilimizde laf etmege,

4- Bütün Qırımtatar halqı olaraq, er fırsatta Vatan Qırımğa qaytıp anda yaşamağa,

5- İşğal astındaki Vatanımız Qırımda yaşağan vatandaşlarımıznıñ telükesizlikleri, amanlıqları ve üriyetleri içün bütün imkânlarnı qullanmağa, davet ete.  Millet, Vatan, Qırım!

QHA